Kiny
Eng
Fr
Inzego z’ibanze zirasabwa kunoza imikorere no kwihutisha serivisi, umuturage agashyirwa ku isonga (amafoto)
Uwajeneza Donatha
Mar 23, 2026 - 13:24
Minisitiri w’Ubutegetsi bw’Igihugu, Habimana Dominique, yasabye inzego za Leta n’izegerejwe abaturage kurushaho kunoza imikorere n’imikoranire mu kwihutisha gahunda z’Igihugu no kunoza serivisi. Yashimangiye ko umuturage agomba gukomeza gushyirwa ku isonga, mu gihe uruhare rwe mu bimukorerwa rugeze kuri 88.4% mu 2025.
kwamamaza
Ibi yabitangaje kur'uyu wa mbere, ku wa 23 Werurwe (03) 2026, mu nama yahawe intero y' "Umuturage ku Isonga" ihuza abayobozi b’inzego bwite za Leta n’abo mu nzego zegerejwe abaturage iri kubera mu Ishuri Rikuru rya Gisirikare riherereye i Gako mu Karere ka Bugesera.
Yavuze ko iyi nama ari urubuga rukomeye rwo kurebera hamwe uko imikorere n’imikoranire byarushaho kunozwa, hagamijwe gufasha abayobozi gusohoza neza inshingano zabo no kwihutisha ishyirwa mu bikorwa rya gahunda za Leta.
Ati “Inzego z’ibanze dufite inshingano zo gushyira mu bikorwa politiki na gahunda z’iterambere z’Igihugu mu buryo bwegereye abaturage, bushyira umuturage ku isonga, bityo akagira uruhare rufatika mu bimukorerwa.”
Minisitiri Habimana yagaragaje ko mu myaka 25 ishize, politiki yo kwegereza ubuyobozi n’ubushobozi abaturage yagejeje ku musaruro ugaragara, aho uruhare rw’umuturage mu bimukorerwa rugeze kuri 88.4% mu 2025.
Yavuze kandi ko serivisi zitangwa n’inzego z’ibanze zimaze kugera kuri 232, mu gihe ingengo y’imari ikusanywa n’uturere yazamutse iva kuri miliyari 48.2 Frw mu 2016 igera kuri miliyari 98.5 Frw mu 2025.
Ku bijyanye n’imicungire y’umutungo wa Leta, Minisitiri Habimana yashimangiye ko inzego z’ibanze zateye intambwe igaragara mu gukoresha no gucunga umutungo wa Leta, mu gihe muri 2018 nta karere na kamwe kayibonaga.
Ati:“Twakwishimira kandi ko inzego z'ibanze zazamuye ubushobozi bigaragara mu gukoresha no gucunga umutungo wa Leta aho ubu uturere 27 twabonye igipimo cya “Ntamakemwa” n’Umugenzuzi w’Imari ya Leta mu 2024 mu gihe mu 2018 nta na kamwe kayibonaga.”
Hagaragajwe uruhare rukomeye rw’inzego z’ibanze mu gushyira mu bikorwa gahunda zireba imibereho y’abaturage, zirimo iz’ubuhinzi, amazi, amashanyarazi, uburezi, ubuzima, ibikorwaremezo no kurengera ibidukikije. Ndetse ko kugira ngo zibashe kuzishyira mu bikorwa, haba hari urundi rwego rwa Leta ruziherekeza kugira ngo zigerweho.
Iyi nama yiswe ‘Central and Local Government Meeting’ igamije kurebera hamwe ibijyanye n’ishyirwa mu bikorwa ry’ingamba na gahunda z’Igihugu ndetse n’imyanzuro iba yafatiwe mu nama zitandukanye. Abitabiriye iyi nama baraganira ku nshingano z’inzego z’ibanze zegerejwe abaturage, izo ku rwego rw’Igihugu ndetse n’aho impande zombi zihurira kugira ngo habeho kwihutisha ishyirwa mu bikorwa rya gahunda za Leta.
Iyi nama kandi yahawe umwihariko wo kuganira ku bijyanye no kubaka Umuryango Nyarwanda, ushoboye kandi utekanye nk’imwe mu nshingano z’ibanze z’inzego z’ibanze, ndetse umuryango ukaba ari wo shingiro ry’Igihugu.
Iyi nama ihuza abayobozi b’Inzego bwite za Leta n'abo mu nzego zegerejwe abaturage ibaye mu gihe hashize imyaka ibiri hashyirwa mu bikorwa icyiciro cya kabiri cya Gahunda y’Igihugu yo kwihutisha Iterambere, NST2 (2024-2029).
Biteganyijwe ko harasuzumwa ibishobora kuba byarakomwe mu nkokora, ibisubizo bishoboka ndetse n’ingamba zafatwa n’inzego zitandukanye kugira ngo Abanyarwanda bagezweho ibyo bemerewe n’Umukuru w’Igihugu.
Dore amwe mu mafoto Abayobozi mu nzego zitandukanye bitabira iyi nama:
kwamamaza